रत्ननगर, चैत ११ । वित्तिय समस्या समाधान संयुक्त राष्ट्रिय महाअभियान महासंघले चैत १७ गते काठमाण्डौमा आयोजना गरेको आन्दोलनमा चितवनका शिवशिखर सहकारी पीडितहरुले पनि सहभागिता जनाउने भएका छन् । शिवशिखर बहुउद्देश्यीय संस्था लिमिटेड संघर्ष समिति टाँडीले सोमबार पत्रकार सम्मेलनको आयोजन गरेर काठमाण्डौमा हुने आन्दोलनमा सहभागी हुने जानकारी दिंदै सम्पूर्ण शिवशिखर पिडितलाई सहभागी हुन अपिल समेत गरेको छ ।
चितवनमा संघर्ष समिति गठन गरेर रकम फिर्ताका लागि प्रयास गरेका पीडितहरुले विभिन्न चरणमा संघर्षको कार्यक्रम गर्दै आइरहेको समितिका अध्यक्ष सुरेसजंग पाण्डेले जानकारी दिए । उनले लामो समयसम्म पनि रकम फिर्ता हुन नसकेका कारण सडक संघर्षमा उत्रनु परेको भन्दै पिडितहरुलाई काठमाण्डौको हुने सडक संघर्ष कार्यक्रममा सहभागि हुन आग्रह गरे ।
पत्रकार सम्मेलनमा उद्योग बाणिज्य संघका केन्द्रिय सदस्य अनिलकृष्ण श्रेष्ठले सहकारीले बचतकर्ताको रकम फिर्ता नगर्दा र सहकारी संचालन गरेको स्थान खाली नगर्दा समस्या भएको बताए । रत्ननगरको सौराहाचोकमा रहेको श्रेष्ठकै जग्गाम शिवशिखरले मार्ट, बचत र रेष्टुरेन्ट संचालन गर्दै आएको थियो र सहकारी समस्याग्रस्त घोषणा भएपछि त्यो ठाँउ खाली हुन सकेको छैन् । ठाउँ खाली हुन नसकेको कारण त्यहाँ रहेको सामान सुरक्षा गर्न चुनौती थपिएको उनले बताए ।
चितवनमा २०७७ साल कार्तिकमा शाखा कार्यालय सञ्चालन भएको सो सहकारी २०७९ माघ महिनामा बन्द भएको थियो । शेयर सदस्य र बचतकर्ताले रकम फिर्ता माग्न थालेपछि कार्यालय बन्द गरी सञ्चालक फरार भएका थिए । रत्ननगरस्थित शाखा कार्यालयमा ४ हजार ८०० शेयर सदस्य तथा बचतकर्ताहरुबाट सो सहकारीले २४ करोड तीन लाख २७ हजार रूपैयाँ संकलन गरेको छ । त्यसैगरी, भरतपुर शाखामा ८ हजार ६४ शेयर सदस्य तथा बचतकर्ताहरुबाट ६४ करोड रूपैयाँ बचत संकलन गरेको छ ।
प्रतिक्रिया
० प्रतिक्रिया